O Castelo de San Antón abrirá as súas portas o vindeiro sábado 16 a unha noite de observación da Lúa, unha iniciativa divulgativa na que o Concello colabora coa Agrupación Astronómica Ío co obxectivo de convidar a cidadanía a observar e adquirir coñecementos sobre o satélite terrestre.

Desta forma, entre as 19.00 e 22.00 horas, o xardín superior do castelo acollerá unha sesión de observación astronómica na que terá implicación directa o equipo de expertos da Agrupación Astronómica Ío. Será unha actividade aberta á cidadanía, para a que non é preciso formalizar inscrición algunha. Desta forma, e sempre que a meteoroloxía así o permita, todas as persoas que asistan á actividade de observación poderán gozar dunha localización idónea para visualizar o satélite desde unha óptica diferente, vivindo esta experiencia nun enclave onde a contaminación luminosa é sensiblemente menor.

Durante a sesión, as e os profesionais da Agrupación Astronómica Ío facilitaranlle telescopios ás persoas asistentes. Ademais, tamén se impartirá un coloquio científico sobre as diversas fases da Lúa, co obxectivo de ensinar a identificalas.

No caso de que a previsión meteorolóxica de cara ao sábado 16 de decembro non fose favorable, o Concello notificará ao longo da vindeira semana, a través das súas canles oficiais, a nova data alternativa para levar a cabo este evento.